Apoya el manifestu

PIESLLAR ALMARAZ Y TOLES DEMÁS. 100% ANOVABLES

Castellanu                     Portugués                             Catalán                                     Gallego

La industria nuclear manifestó les sos intenciones d’allongar el funcionamientu de les centrales nucleares acullá de los 40 años de diseñu. Asina, ENEL-ENDESA, IBERDROLA y GAS NATURAL-FENOSA, van poder solicitar l’anovación de los permisos d’autorización de la esplotación ente lo que queda del presente añu y el que vien. La central nuclear d’Almaraz va ser la primera en pidir l’ampliación a partir del 8 de xunu, tres ella va venir Vandellós el 26 de xunetu de 2017, Cofrents, el 20 de marzu de 2018; y Ascó 1 y 2, a partir del 2 d’ochobre de 2018. La única esceición va ser Trillo, a partir del 17 de payares de 2021.

El pasáu 30 de payares modificóse’l reglamentu del Conseyu de Seguridá Nuclear (CSN) pa desvenceyar l’anovación del permisu de funcionamientu del requisitu de la revisión técnica de seguridá de cada reactor, lo qu’abre la puerta a que’l gobiernu del Partíu Popular puea conceder permisos ensin esta revisión de la seguridá.

Ante estes intenciones de la industria nuclear el Movimientu Ibéricu Antinuclear y les organizaciones roblantes del presente manifiestu, recuerden que:

La enerxía nuclear ye una tecnoloxía que foi desendolcada por motivos militares, y que la so crecedera namás foi posible gracies al sofitu económicu y políticu de los gobiernos, siendo una pilastra clave na proliferación nuclear. Una enerxía que se convirtió dende’l so orixe nuna tresferencia continua de recursos de los ciudadanos a les grandes multinacionales y los bancos.
La enerxía nuclear ye cara, puerca y peligrosa. Los graves accidentes asocedíos a lo llargo de la so hestoria, como los de Harrisburg, Chernóbil o Fukushima, amuesen con claridá’l riesgu qu’implica la enerxía nuclear. Un riesgu siempres presente que supon enormes inversiones económiques en materia de seguridá y aumenten exponencialmente el costu de la enerxía nuclear. Amás la xeneración de miles de tonelaes de borrafes radiactives, que caltienen la so tosicidá mientres miles d’años hipotecando pa tola vida les xeneraciones futures.  Tou ello convierte a la nuclear nuna enerxía demasiáu costosa en términos sociales, ambientales y enerxéticos.

El funcionamientu hasta los 60 años supon un riesgu inaceptable cuidao que los accidentes van ser más probables nun parque nuclear avieyáu. La radiactividad nun conoz les fronteres asina, un escape de cualisquier de los reactores n’Almaraz por casu, podría afectar a Portugal.

Esti allargamientu implicaría tamién un aumentu considerable de les borrafes radiactives a xestionar. Especialmente los d’alta actividá que son peligrosos mientres cientos de miles d’años y pa los que nun esiste una forma de xestión aceptable.
Nesti sentíu, tien d’empecipiase l’esmantelamientu de la central de Garoña de forma inmediata. Amás de nun conceder nengún permisu más p’allongar el funcionamientu de les centrales. Va ser precisamente la central d’Almaraz, la primera en solicitar esta prórroga enantes del viniente 10 de xunu. Una central que los sos dos reactores tienen una potencia equivalente a 5 vegaes la de Garoña y que xenera grandes beneficios a les sos propietaries Iberdrola, Gas Natural y Endesa, a pesar de que la so seguridá ta degradada.
Tan solo un mes dempués de la solicitú per parte d’Almaraz va ser Vandellós II en Tarragona quien solicite’l permisu. Siguiendo con Cofrentes (Valencia), Ascó (Tarragona) y Trillo (Guadalaxara).
La única razón pa esti allargamientu nuclear ye siguir col llogru de beneficios millonarios al traviés de la factura elléctrica y otres subvenciones costeadas pola ciudadanía. La so mera esistencia supon un enorme frenu al desendolcu de les enerxíes anovables, que constitúin l’auténtica garantía pa un sistema enerxéticu 100 % anovable. De la mesma que l’entamu del so esmantelamientu ye un momentu clave pa encetar un auténticu desendolcu alternativu pa les rexones nucleares.
El proyectu de construcción d’un campusantu nuclear en Villar de Cañas (Cuenca) nunos terrenos desavenientes, con un riesgu xeolóxico inasumible, ye otru de los despropósitos del actual gobiernu qu’amuesa la incapacidá pa encarar un alderique trescendental como ye’l de la xestión d’estes borrafes altamente peligroses. Tampoco queremos el campusantu nuclear del Cabril
Un alderique que foi ignoráu en Salamanca onde a pesar de la enorme oposición de los vecinos y de la hipoteca que va suponer pa tol campu del Yeltes, el CSN, y los gobiernos d’España y de Castiella y Llión, dieron los permisos pa la que sería la única mina d’uraniu a cielu abiertu d’Europa. Tanto ye asina, qu’ensin rematar tolos trámites dexóse a la multinacional australiana Berkely afarar el territoriu y baltar encinas centenaries pa esplotar un xacimientu que nun ye rentable. Unes actividaes que tienen de detenese.
Ante estes intenciones, les organizaciones, colectivos y persones antinucleares van solicitar el viniente 10 de xunu en Madrid el fin d’estes ampliaciones y un calendariu de pieslle nuclear. Pa ello tendrá de ser el Parllamentu quien apruebe una llei qu’afite un calendariu de pieslle que ponga fin a la enerxía nuclear nel nuesu país.
Solicitamos al Gobiernu, que nun anueve nengunu de los permisos a les centrales nucleares, y que proceda al esmantelamientu de Garoña.
Solicitamos que nun se furtie a la ciudadanía esti alderique fundamental pal impulsu d’un nuevu modelu enerxéticu xustu y caltenible.  Un modelu 100% anovable que namas va ser posible al traviés del abandonu de la enerxía nuclear.
Anuncios